Viðskipti innlent

Áhyggjuefni hve erfitt sé að treysta raforkuöryggi

Kristján Már Unnarsson skrifar

Ráðamenn raforkumála segja þrengt að raforkuöryggi í landinu og það sé orðið mikið áhyggjuefni fyrir samfélög hve erfitt sé að afla leyfa til að bæta úr. Þetta kom fram í fréttum Stöðvar 2.

Ef rafmagnið færi af, þá gætum við ekki horft á sjónvarpsfréttirnar, við gætum varla verið á internetinu, raunar er nánast öll atvinnustarfsemi í landinu háð því að hafa rafmagn. Krafa nútímasamfélags er því raforkuöryggi.

Þetta var umræðuefni tveggja daga fundar Samorku en þar kom fram að ráðamenn raforkumála hafa áhyggjur af því að geta ekki lengur tryggt öllum rafmagn.

Byggðalínan í Reykjadal í Suður-Þingeyjarsýslu eftir óveður í september 2012.Stöð 2/Egill Aðalsteinsson.

„Þessar gömlu byggðalínur eru flestar komnar á tíma og við sjáum fyrirtæki, til dæmis á Norðurlandi og Austurlandi, sem ekki geta stækkað við sig vegna þess að ekki er hægt að flytja meiri raforku til þeirra,“ segir Helgi Jóhannesson, forstjóri Norðurorku og formaður Samorku. 

Fiskimjölsverksmiðja HB Granda á Vopnafirði er eitt dæmið. Þar skiptu menn úr olíu yfir í rafmagn fyrir sex árum en neyðast samt reglulega til að hægja á afköstum þar sem línurnar flytja ekki nægilegt rafmagn. Það gengur hins vegar hægt að styrkja flutningskerfið. 

Fiskimjölsverksmiðjan á Þórshöfn á Langanesi gengur enn fyrir olíu.vísir/pjetur

„Samfélagið hefur smámsaman breyst í þá veru að það að sækja leyfi til framkvæmda tekur miklu lengri tíma en var áður. Og við höfum bara séð þau vandræði sem flutningsfyrirtækið á við að koma línum í gegnum landið, - hvað þarf mikið af leyfum, það þarf að ná sátt við aðila. Við höfum séð dóma falla. Þetta tekur bara svo langan tíma og það er áhyggjuefni. Mikið áhyggjuefni fyrir okkur öll.“ 

Helgi bendir hins vegar á að raforkufyrirtækin hafa enga skyldu til að selja öllum rafmagn, ekki einu sinni heimilunum í landinu. 

„Það er í raun mikil eftirspurn eftir raforku og ekkert þeirra stóru framleiðslufyrirtækja sem eru að framleiða hafa í raun skyldu til þess, skulum við segja, að eiga nægt rafmagn fyrir, ja bara almenning í landinu. Þau gætu þessvegna selt til stærri aðila með langtímasamningum stóran hluta raforkunnar og þá sætum við uppi með það kannski, við skulum segja almenningur og atvinnulíf í landinu, að ekki væri til næg raforka,“ segir formaður Samorku.


Tengdar fréttir

Miðhálendið verði sett á heimsminjaskrá

Lögð hefur verið fram þingsályktunartillaga um að fela ríkisstjórninni að setja miðhálendi Íslands á yfirlitsskrá yfir heimsminjar UNESCO og fela heimsminjanefnd Íslands að undirbúa umsókn þar að lútandi.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×