Lífið

Ágústspá Siggu Kling – Ljón: Ástarorkan er í ham

Elsku hjartans tilkomumikla Ljónið mitt! Það er búið að vera mikið tilfinningaflipp í kringum þig og það er yfirleitt þannig með þig að það er annaðhvort allt eða ekkert.

Þú stendur á miklum krossgötum núna og ert að taka ákvörðun, reyndar margar ákvarðanir. Með því að taka ákvarðanir verður þú frjáls. Hvort sem þessar ákvarðanir sem þú þarft að taka eru litlar eða stórar þá eiga þær eftir að eiga þátt í því að breyta lífi þínu. Þú finnur að það verður friðsælla og þú hefur betri tök á tilverunni. Þetta kallast að ná jafnvægi og þegar maður nær því þá er það sko alveg dásamlegt!

Ástarorkan þín er í miklum ham núna, bæði til þess að bæta ástina sem er til staðar og líka til þess að segja bara bless við slæma ást.

Þú ert á tímabili núna þar sem allt magnast upp og mundu að þú ert þessi magnari í lífi þínu. Á Íslandi er Snæfellsjökull mesti magnari landsins. Þegar fólk er hamingjusamt og glatt og fer á þetta svæði þá magnar það hreinlega upp gleðina. Það hafa til dæmis margir gift sig við rætur Snæfellsjökuls og það er ekki tilviljun, mitt kæra Ljón, magnarar magna nefnilega líka upp ástina!

Alheimurinn er að senda þér sterkan kraft til að koma þér upp úr þeim sporum sem þú vilt ekki standa í og þú ert líka að fá ást og heilun í hjartastað.

Hverju upphafi fylgir endir og núna er sannarlega upphaf einhvers. Ekki plana neitt langt fram í tímann, taktu frekar einn dag í einu. Það er langbest fyrir orkuna þína og svo á maður ekki alltaf að vera of skipulagður.

Þú færð verðlaun eða viðurkenningu þegar þú ert búinn að klára það sem þú hafðir ætlað þér að gera og ekki bíða með neinn skapaðan hlut. Lífið er nákvæmlega núna!

Trúðu á ástina og þá trúir hún á þig!

Lífið er yndislegt.

Knús og koss, þín Sigga Kling

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco.

 


Tengdar fréttir

Ágústspá Siggu Kling – Vog: Vekur athygli þegar haustar

Elsku hjartans dásemdar Vogin mín. Þú hefur klifið mörg fjöll og sum þeirra hafa verið mjög brött og erfið. En það er nú bara þannig að þegar þú ert komin upp á topp þá ertu ánægð og litlir sigrar verða að stórum þegar þú safnar þeim saman.

Ágústspá Siggu Kling – Fiskur: Allt í lagi að vera óþekkur!

Elsku ótrúlega fallegi Fiskurinn minn. Ef þú hefur einhverjar áhyggjur af því að þú getir ekki gert það sem þig langar til að gera þá þarft þú að spá í það að vilja það sem þú getur gert. Þetta er oft spurning um hugarfar.

Ágústspá Siggu Kling – Vatnsberi: Fyllist af krafti

Elsku hjartans Vatnsberinn minn. Ágúst verður miklu skemmtilegri mánuður en þú hefur þorað að vona. Það er eins og það sem þú ert búinn að ákveða að gangi upp muni bara gera einmitt það og þú verður svo dásamlega ánægður!

Ágústspá Siggu Kling komin á Vísi!

Stjörnuspár Sigríðar Klingenberg spámiðils hafa notið gríðarlega vinsælda undanfarin ár. Mánaðarlega spáir hún fyrir lesendum Vísis og Fréttablaðsins, í formi texta og myndbands, en spár hennar fyrir ágústmánuð má sjá hér fyrir neðan.






Fleiri fréttir

Sjá meira


×