Afsakanlegt gáleysi önnum kafins manns

Jakob Möller sagði við málflutning í Héraðsdómi í dag að meint bókhaldsbrot Tryggva Jónssonar væru mistök sem ættu sér skýringar. Ekki væri um ásetning að ræða eða stórfellt gáleysi, heldur afsakanlegt gáleysi önnum kafins manns. Jakob vísaði þannig til 16. ákæruliðs sem snýr að bókfærðri kredityfirlýsingu frá færeyska fyrirtækinu SMS.

Tryggva hafi verið ljóst að Baugur ætti verulega óbókfærða afslætti hjá ýmsum fyrirtækjum. Lögreglan hefði hins vegar ekki rannsakað þann þátt í tengslum við ákæruliðinn. Tryggvi hefði enn fremur heyrt á framkvæmdastjórafundi hjá Baugi að innflutningur á kaffi frá fyrirtækinu væri fyrirhugaður. Slík viðskipti hefðu áður átt sér stað og taldi Tryggvi ljóst af öllu þessu að innstæða væri fyrir færslunni. Af viðskiptunum varð síðan ekki.

Jakob fjallaði einnig um meint bókhaldsbrot Jóns Ásgeirs og Tryggva í 17. ákærulið. Þar er þeim gefið að sök að hafa ranglega bókfært sölu á hlutabréfum Baugs til Kaupthings í Lúxemborg þar sem sala hafi aldrei átt sér stað. Tilgangurinn hafi verið að fela hvert bréfin ættu að fara en þau fóru inn á vörslureikning hjá Kaupthingi í Lúxemborg. Bréfin hafi átt að nota til að uppfylla kaupréttarsamninga við þá tvo og Óskar Magnússon, stjórnarformann Baugs á árinu 1999.

Jakob benti á að engar reglur hefðu verið í íslenskum lögum á þessum tíma um hvernig fara skyldi með kaupréttarsamninga í bókhaldi. Þá væri fráleitt að halda því fram að verið væri að draga dul á hverjir væru raunverulegir viðtakendur bréfanna. Fram hefði komið í fundargerðum stjórnar Baugs að gerðir hefðu verið ráðningasamningar við þremenningana. Þá hefði ekki verið sannað að Tryggvi eða Jón Ásgeir hefðu komið að færslunni í bókhaldi Baugs.

Þá fjallaði Jakob um ákæru vegna notkunar Tryggva á kreditkorti frá Nordica. Hann benti á að engin sundurliðun væri á reikningunum. Verulegir annmarkar væru því á ákæruliðnum að þessu leyti. Jón Ásgeir vissi til þess að Tryggvi hefði beðið Jón Gerald Sullenberger um að senda sér greiðslukortayfirlit vegna kortsins en Jón Gerald hefði ekki gert það. Þannig hefði Tryggvi ekki haft neinn ásetning um fjárdrátt frá Baugi.

Að lokum sagði Jakob dóminn þurfa að hafa í huga að rannsókn málsins væri að mörgu leiti gölluð. Fjögur ár og sjö mánuðir séu liðnir frá húsleit í húsakynnum Baugs sem markaði upphaf málsins. Þá hefðu Tryggvi, Jón Ásgeir og Baugur sýnt mikinn samstarfsvilja í málinu, þrátt fyrir að mikið hefði reynt á þá. Tryggvi væri ennfremur algjörlega sannfærður um sakleysi sitt.

Nú tekur Gestur Jónsson við og fjallar um meinta tilhæfulausa kreditkortareikninga Nordica og meintan fjárdrátt í tengslum við skemmtibátinn Thee Viking.