Erlent

Aðskilnaðarsinnar ganga rétt frá líkum

Snærós Sindradóttir skrifar
Hollensku sérfræðingarnir kanna líkamsleifar sem komið hefur verið fyrir í kæliklefum lestar.
Hollensku sérfræðingarnir kanna líkamsleifar sem komið hefur verið fyrir í kæliklefum lestar. Nordicphotos/AFP
Hollenskir sérfræðingar í að bera kennsl á lík eru sáttir við hvernig staðið hefur verið að frágangi á líkum í kringum brak flugvélar Malaysia Airlines sem skotin var niður á fimmtudag í austurhluta Úkraínu.

Þetta segir Stefán Haukur Jóhannesson sem starfar fyrir eftirlitssveit Öryggis- og samvinnustofnunar Evrópu, ÖSE, á svæðinu. Aðskilnaðarsinnar hafa sinnt frágangi á svæðinu síðan á föstudag.

Stefán Haukur JóhannessonFréttablaðið/Anton Brink
„Þegar við komum á föstudag, sólarhring eftir að vélin kom niður, þá var mikið af líkum og líkamsleifum innan um brak og persónulega muni fólks. Síðan virðast þeir [aðskilnaðarsinnar] hafa hafist handa og við höfum fylgst með þeim fjarlægja lík og setja í líkpoka og koma þeim á ákveðinn stað á lestarstöð í kælivagna,“ segir hann. 

Aðskilnaðarsinnar hafa verið sakaðir um að fjarlægja líkin til að eyða sönnunargögnum. 

Stefán Haukur segir að eftirlitssveit ÖSE hafi fylgst með aðskilnaðarsinnunum að verki síðustu daga en geti ekki staðfest að þessi gagnrýni sé réttmæt.

„Auðvitað þarf að byrja að fjarlægja lík sem fyrst. Það þarf að umgangast líkamsleifar fólks af virðingu. Þetta er mikill harmleikur,“ segir Stefán Haukur.

Aðskilnaðarsinnar hafa nú þegar afhent malasískum yfirvöldum svarta kassa vélarinnar sem fannst á vettvangi. Vonast er til þess að hann geti gefið vísbendingar um síðustu augnablik vélarinnar.

Bandaríkjastjórn telur að MH17 hafi verið skotin niður með hreyfanlegu SA-11 flugskeyti sem skotið er frá jörðu. Slík flugskeyti eru gríðarlega dýr og flókin og því fá dæmi þess að þau séu í eigu annarra en þjóða sem búa yfir hervopnum. Árið 1988 var írönsk farþegaþota skotin niður með sambærilegu vopni af Bandaríkjaher.




Fleiri fréttir

Sjá meira


×