Áætlaður kostnaður 665 milljónir

Áætlaður kostnaður við gerð ofanflóðavarna neðan Gleiðarhjalla í Skutulsfirði er 665 milljónir króna að því er greint var frá á kynningarfundi sem haldinn var í gærkvöldi. Ríflega 30 íbúar mættu til fundarins. Gert er ráð fyrir að framkvæmdin taki um fjögur ár. Áætlað er að reisa fimm metra háan varnargarð eftir endilangri hlíðinni til varnar aurflóðum og grjóthruni. Einnig á að reisa fjórtán metra háa ofanflóðavörn neðan líklegustu snjóflóða farveganna í Stakkaneshrygg og Stóruurð. Þá verður reistur sjö metra hár og 125 metra langur snjóflóðavarnargarður. Heildar fyllingarmagn í garðanna er áætlað um 128.000 rúmmetrar og taka þeir yfir 62.400 m² svæði.

Meðal þeirra spurninga sem komu fram á fundinum var hvort nauðsynlegt væri að byggja eins stóra varnargarða og ráðgert er. Jóhann Birkir Helgason, bæjarverkfræðingur, sagði að þeirri spurningu hafi í raun verið svarað fyrir mörgun árum. „Það var hættumatsnefnd Ísafjarðarbæjar sem mat hættuna sem var staðfest af ráðherra. Það verður að meta hættuna út frá þessu mati. Við getum ekkert breytt lögunum.“

Það er fyrirtækið Mannvit hf., sem sér um hönnun garðanna en gert er ráð fyrir að þeirri vinnu verði lokið 1. apríl nk. „Næstu skref eru að klára að hanna mannvirkið og sjá hvernig við komum lögnum fyrir en ráðgert er að sem flestum lögnum verði komið fyrir í eða við garðanna. Í framhaldinu verður komið með tillögur um hvernig verkinu verður skipt upp. Gert er ráð fyrir að framkvæmdinni verði skipt niður í nokkur verk og stefnt er að því að færslu lagna í sumar,“ segir Jóhann Birkir. Íbúar við Urðarveg geta átt von á einhverju ónæði vegna framkvæmdanna og þá sérstaklega vegna hávaða.

Vatnsleki er í jarðveginum á framkvæmdasvæðinu vegna aurbleytu og snjóa og seytlar nokkuð af vatninu inn í kjallara og garða á svæðinu. Jóhann Birkir segist ekki geta sagt til um hvort þetta vandamál leysist við gerða varnargarðanna. „Við vitum ekki nákvæma hvers vegna lekur í kjallara og garða, en ekki óalgengt að í 30 ára gömlum húsum séu drenlagnir orðnar lélegar. En við vonumst til að þetta lagist við að dýpka skurðina fyrir ofan garðana. Við munum skoða vel aðstæður á hverjum stað fyrir sig og hvort eitthvað muni breytast við framkvæmdina.“

Jóhann Birkir telur ekki að bleyta í jarðvegi muni tefja fyrir framkvæmdunum. „Það er þó ekki hægt að útiloka það. Þær prufuholur sem hafa verið teknar á þessu svæði hafa verið þurrar en maður veit aldrei þegar maður er að vinna með svona efni.“

asta@bb.is



Um 30 manns mættu fundinn.