Körfubolti

49 stig Irving og þrenna LeBron ekki nóg

Eiríkur Stefán Ásgeirsson skrifar
Dion Waiters, lengst til hægri, fagnar sigurkörfu sinni. Klay Thompson stendur agndofa eftir.
Dion Waiters, lengst til hægri, fagnar sigurkörfu sinni. Klay Thompson stendur agndofa eftir. Vísir/Getty
Tvö efstu lið NBA-deildarinnar, Golden State í vestrinu og Cleveland í austurinu, töpuðu bæði sínum leikjum í NBA-deildnni í nótt.

Miami vann Golden State á heimavelli, 105-102, og batt þar með enda á sjö leikja sigurgöngu Golden State.

Dion Waiters setti niður þriggja stiga körfu þegar 0,6 sekúndur voru eftir af leiknum og tryggði þar með sigur Miami. Hann átti stórleik og skoraði samtals 33 stig í leiknum.

Miami var með undirtökin í leiknum en Kevin Durant náði að jafna metin með troðslu þegar tíu sekúndur voru eftir. En það var ekki nóg.

Stephen Curry náði að taka skot um leið og leiktíminn rann út en það geigaði. Hann var alls með 21 stig, tíu fráköst og átta stoðsendingar en stigahæstur var Durant með 27 stig.



New Orleans vann Cleveland, 124-122, þar sem Terrence Jones var hetjan með 36 stig og ellefu fráköst. Jrue Holiday bætti við 33 stigum og tíu stoðsendingum.

New Orleans var með væna forystu eftir fyrri hálfleikinn en Cleveland náði að minnka hana í þrjú stig þegar ein og hálf mínúta var eftir. En nær komust meistararnir ekki.



Kyrie Irving skilaði ótrúlegum tölum fyrir Cleveland en hann var samtals með 49 stig, þar af 35 í síðari hálfleik. LeBron James var með þrefalda tvennu - 26 stig, tólf stoðsendingar og tíu fráköst.



Oklahoma City Thunder vann Utah, 97-95. Russell Westbrook skoraði sigurkörfu leiksins þegar 1,4 sekúndur voru eftir en hann var alls með 38 stig, tíu fráköst og tíu stoðsendingar.

Þetta var alls 22. þrefalda tvenna Westbrook á tímabilinu en það stefnir í metár hjá honum í þessum efnum.



Úrslit næturinnar:

Charlotte - Washington 99-109

Brooklyn - San Antonio 86-112

Atlanta - LA Clippers 105-115

Miami - Golden State 105-102

Detroit - Sacramento 104-109

Milwaukee - Houston 127-114

New Orleans - Cleveland 124-122

Indiana - NY Knicks 103-109

Utah - Oklahoma City 95-97

NBA



Fleiri fréttir

Sjá meira


×