Viðskipti innlent

„Mætti segja að ég hafi ekki verið sérstaklega góður yfirmaður“

Hulda Hólmkelsdóttir skrifar
Magnús Pálmi kom fyrir Héraðsdóm Reykjavíkur í morgun. Til vinstri er Almar Þór Möller, verjandi Jónasar Guðmundssonar.
Magnús Pálmi kom fyrir Héraðsdóm Reykjavíkur í morgun. Til vinstri er Almar Þór Möller, verjandi Jónasar Guðmundssonar. Vísir/Ernir
Magnús Pálmi Örnólfsson, fyrrverandi forstöðumaður eigin viðskipta Glitnis, segir að hann hafi aldrei grunað að hann væri að taka þátt í markaðsmisnotkun þegar félag í hans eigu fékk lán til að kaupa hluti í Glitni banka.

Magnús Pálmi bar vitni í markaðsmisnotkunarmáli Glitnis í Héraðsdómi Reykjavíkur í dag. Nokkra athygli vakti þegar ákæra var gefin út í málinu að Magnús Pálmi hafi ekki verið ákærður, en þrír ákærðu voru undirmenn hans og Jóhannes Baldursson, sem einnig er ákærður, var hans næsti yfirmaður. Í sambærilegum málum hafa fyrrverandi forstöðumenn eigin viðskipta verið ákærðir og sakfelldir í málinu.

Magnús Pálmi sagði fyrir dómi í morgun að þeir Jónas Guðmundsson, Pétur Jónasson og Valgarð Már Valgarðsson, fyrrverandi starfsmenn deildar eigin viðskipta sem ákærðir eru í málinu, hafi gengið inn í ákveðið verklag um viðskipti með eigin bréf bankans sem hafi viðgengist um árabil.

Hann segir að í stuttu máli hafi tilgangur deildar eigin viðskipta bankans að græða peninga á viðskiptum með eigin hlutabréf. Starfsmenn deildarinnar hafi haft til þess ákveðnar heimildir sem samþykktar voru af áhættunefnd bankans og að öll viðskipti hafi farið fram fyrir opnum tjöldum.

Treysti starfsmönnum fullkomlega

Hann segist lítið hafa skipt sér að daglegum viðskiptum með eigin bréf bankans, enda hafi hlutabréfaviðskipti ekki verið hans sérsvið.

„Það mætti segja að ég hafi ekki verið sérstaklega góður yfirmaður, ég var ekki að fylgjast með þessu. Ég treysti þeim fullkomlega til þess að sinna þessu, þeim starfsmönnum sem voru í þessu,“ sagði Magnús Pálmi.

Hann segist ekki muna eftir athugasemdum frá áhættustýringu bankans eða öðrum eftirlitsstofnunum um viðskipti deildarinnar. Hann hafi reglulega fengið skýrslu frá áhættustýringu um viðskiptin og honum hafi mátt vera ljóst hvaða staða væri uppi hverju sinni. Hann segist þó muna eftir einhverri umræðu um tap deildar eigin viðskipta.

Hefðu getað brugðist öðruvísi við

„Þetta var náttúrulega ekki að ganga neitt sérstaklega vel. Já já, þetta var einhvern tíman rætt. Við Jóhannes ræddum þetta örugglega öðru hvoru,“ sagði Magnús Pálmi en hann mundi ekki nákvæmlega hvað hafði farið þeim á milli.

Við upphaf aðalmeðferðar í morgun. Lárus Welding og Jóhannes Baldursson ræða sín á milli.Vísir/Ernir
Hann sagðist jafnframt muna eftir umræðu um hvernig bregðast mætti við slæmri stöðu deildarinnar en hann mundi ekki eftir því að komið hefði til tals að endurskoða mikil kaup á eigin bréfum.

„Það hefðu alveg getað verið ein viðbrögðin,“ sagði Magnús Pálmi. „Við höfðum trú á að við myndum sigla í gegnum þetta. Mjög margt eftir á sem hefði verið betra að gera en þetta var gart.“

Hluti af launakjörum

Langidalur, einkahlutafélag í eigu Magnúsar Pálma var eitt fjórtán fyrirtækja í eigu jafnmargra starfsmanna Glitnis sem fékk lán til kaupa á hlutabréfum í Glitni. Hann segir að Jóhannes Baldursson hafi kynnt fyrirkomulagið fyrir sér.

„Ég leit á þetta sem hluta af mínum kjörum, sambærilegt við það sem maður hafði horft upp á í mörg ár, yfirmenn bankana vera að fá.“

Sem fyrr segir vakti athygli þegar Magnús Pálmi var ekki ákærður í markaðsmisnotkunarmálinu. Hann samdi sig frá ákæru í hinu svokallaða STÍM-máli þar sem bæði Lárus Welding og Jóhannes Baldursson voru dæmdir til fangelsisvistar. Var hann lykilvitni í málinu en hann breytti framburði sínum í yfirheyrslum hjá sérstökum saksóknara og veitti embættinu upplýsingar gegn því að hann nyti friðhelgi frá saksókn í málinu. Var á það fallist af hálfu ríkissaksóknara og naut Magnús því réttarverndar í málinu en hann hafði upphaflega stöðu sakbornings.

Í máli Gríms Grímssonar, sem fór með rannsókn málsins hjá embætti sérstaks saksóknara, á föstudag kom fram að Magnús Pálmi hefði ekki gert samning við ákæruvaldið í markaðsmisnotkunarmálinu. Við lok rannsóknar hafi einfaldlega verið tekin ákvörðun um að ekki skyldi ákæra Magnús Pálma. 


Tengdar fréttir






Fleiri fréttir

Sjá meira


×