„Leggjum alla hræsni til hliðar“

Stjórn Verkalýðsfélags Vestfirðinga hvetur stjórn Lífeyrissjóðs Vestfirðinga til að leggja spilin á borðið og upplýsa hinna almenna sjóðfélaga um hvert raunverulegt tap sjóðsins var á árunum 2005 - 2010 og hve mikil skerðing hefur orðið þegar til lengri tíma er litið. „Við skulum leggja alla hræsni til hliðar og vera þess minnug að við sjálf gerðum þá kröfu að okkar sjóður skilaði sambærilegri eða jafnvel hærri ávöxtun en raunhæft var að gera til langtíma sparnaðarforms, eins og lífeyrissparnaður vissulega er. Eftir því sem ávöxtunin varð hærri urðu líkurnar á djúpri niðursveiflu einnig meiri ef fjármálakerfi landsins fengi áfall líkt og gerðist í bankahruninu 2008,“ segir í pistli á vef félagsins.

Á fundi stjórnar Verk-Vest á þriðjudag varð mikil umræða vegna nýútkominnar skýrslu úttektarnefndar á sem unnin var um starfsemi, fjárfestingarstefnu, ákvarðarnartöku Lífeyrissjóðs Vestfirðinga. Stjórn Verk Vest fagnar útkomu skýrslunnar og hvetur sjóðsfélaga til málefnalegar og gagnýninnar umræðu um niðurstöðu hennar. „Ljóst er að gríðarlegir fjármunir hafa tapast við fall bankanna og harmar stjórn Verk-Vest að hinn almenni sjóðfélagi skuli þurfa taka á sig skerðingar vegna þessa,“ segir í pistlinum.

Þar segir jafnframt: „En eitt af því alvarlegasta sem skýrslan bendir á er hið hrópandi óréttlæti og mismunun sem landsmenn búa við eftir því hvort þeir greiði iðgjöld í almenna sjóði eða hina opinberu. Því ekki eingöngu þurfa okkar sjóðfélagar að taka á skerðingu vegna tapaðra fjármuna okkar sjóða heldur einnig vegna aukinnar skattbyrgði sem lögð er á almennu sjóðina svo hægt sé að viðhalda óbreyttu réttinda kerfi opinberu sjóðanna. Verum þess minnug að eitt af stóru loforðum ríkisstjórnarinnar frá kjarasamningunum 2011 var jöfnun lífeyrisréttinda landsmanna.“ Stjórn Verk-Vest segir niðurstöður skýrslunnar staðfesta með óyggjandi hætti að þá vinnu verði að hefja strax.

„Þrátt fyrir þá erfiðu stöðu sem lífeyrissjóðirnir hafa staðið frammi fyrir frá árinu 2008 má ekki gleymast að Lífeyrissjóði Vestfirðinga tókst þrátt fyrir allt að standa hrunið að mestu af sér, sem er meira en hægt er að segja um banka og sparisjóði landsmanna. Það sýnir ársreikningur sjóðsins fyrir árið 2010 borið saman við árin fyrir hrun. Þar má sjá að hrein eign til greiðslu lífeyris í lok árs 2010 var 26,2 milljarðar króna og hafði aðeins lækkað um 1,2 milljarða króna frá árslokum 2007. Þessi mikli viðsnúningur réttlætir þó ekki það mikla tap sem sjóðurinn varð fyrir. En nánast ógjörningur var að bregðast við þeim áföllum án þess að eitthvað yrði undan að láta,“ segir í pistlinum.

Stjórn Verk-Vest stefnir að því að kalla saman fulltrúaráð félagsins í Lífeyrissjóði Vestfirðinga þegar línur eru farnar að skýrast betur, til að fara yfir niðurstöður úttektarnefndarinnar. „Stjórn félagsins telur það skyldu þess að sjá til að sjóðfélagar verði upplýstir á mannamáli um stöðu sjóðsins og honum þannig sýnt fram á hvernig stjórn sjóðsins hafi brugðist við til að koma í veg fyrir að slík staða geti komið upp að nýju.“

thelma@bb.is