Lífið

„Ísland er náttúrulega paradís ljósmyndarans“

Baldvin Þormóðsson skrifar
Xárene segir veðrið á Íslandi breytast á fimm mínútna fresti.
Xárene segir veðrið á Íslandi breytast á fimm mínútna fresti. vísir/gva
„Fólk áttar sig stundum ekki á því hvað veðrið hefur gríðarleg áhrif á líðan þess,“ segir listakonan Xárene Eskandar en hún opnar sýningu sína Iceland Weather Reports í dag klukkan 16 í Hannesarholti.

„Þetta byrjaði sem verkefni í Los Angeles þar sem það er alltaf sól og sama veðrið sem hefur líka áhrif á þig, þó að það breytist ekkert,“ segir Xárene. „Á Íslandi er það alveg öfugt, það breytist alveg á fimm mínútna fresti eins og þið segið.“

Sýningin samanstendur af ljósmyndum og vídeóverkum sem Xárene hefur tekið á mismunandi stöðum Íslands og ljóðrænum textabútum sem hún skrifar um líðan sína hverju sinni.

„Ég reyni að fanga kjarna hvers staðar fyrir sig,“ segir listakonan. „Ég reyni að skrifa þannig að hver sem les textann geti tengt við hann, þrátt fyrir að hafa ekki verið á staðnum akkúrat þetta augnablik þá skilji lesandinn samt hvað ég á við.“

Þetta ber þó ekki að skilja þannig að listakonan skrifi nákvæma veðurlýsingu í textabrotunum. „Þú færð vísbendingar en þetta snýst meira um hvernig veðrið lætur manni líða,“ segir Xárene. „Ég reyni að tala um önnur áhrif en að segja nákvæmlega hitastigið og vindáttina.“

Listakonan segir sýninguna vera mjög persónulega og að hún sé smá stressuð að sýna hana Íslendingum. „Ég vildi ekki vera með þessar týpísku landslagsmyndir af Íslandi,“ segir Xárene. „Ég veit ekkert hvað fólki mun finnast, Ísland er náttúrulega paradís ljósmyndarans.“

Fyrirtækið Samsung hleypur undir bagga með listakonunni en í síðustu viku var hún ekki viss um hvernig hún ætlaði að sýna myndböndin á sýningunni.

„Ég var orðin frekar stressuð,“ segir hún og hlær en Samsung lánar Xárene fáein sjónvörp til þess að sýna vídeóverkin en sýningin sjálf verður í Hannesarholti og verður opnuð í dag klukkan 16.






Fleiri fréttir

Sjá meira


×