Innlent

„Auðvitað er ég vongóð“ – Frábært ef ég ætti systkini og fjölskyldu

Hanna Rún Sverrisdóttir skrifar
Fjölmargir hafa sett sig í samband við Lindu Rut Sigríðardóttur sem leitar blóðföður síns. Linda Rut er fædd í ágúst 1989 en eins og fram kom á Vísi í gær komst hún að því að sá sem hún hafði talið blóðurföður sinn var það ekki.  

Linda fór þá að grennslast fyrir og fékk að vita það að faðir hennar heitir Richard Guildford og vann í verbúð í Súðavík á árunum 1987 til 1989. Hann er breskur og fæddur árið 1959. Hún biðlaði til fólks í gegnum Facebook-síðu sína að hjálpa sér við leitina að Richard.

Fjölskylda Lindu, mamma hennar, móðursystir, amma og afi aðstoða Lindu við leitina. „Það má eiginlega segja að þetta sé eitt stórt fjölskylduverkefni,“ segir Linda.

Bretar búsettir bæði hér á landi og í Bretlandi hafa haft samband við Lindu og sömuleiðis fjöldi Íslendinga búsettir í Bretlandi.

„Ein kona sem hafði samband benti mér á að hann byggi fyrir utan London og að hann væri frá bænum Bath,“ segir Linda. Önnur kona sem þekkti hann einu sinni hafði líka samband og sagði Lindu ýmsar upplýsingar um hann.

„Við erum komin með rosalega mikið af upplýsingum sem við erum að fara í gegnum. Næst ætlum við að hafa samband við utanríkisþjónustuna og hagstofuna. Við erum sko ekki hætt,“ segir Linda. Þeim hefur einnig verið bent á að hafa samband við fréttastofu Sun í Bretlandi. Jafnframt hefur henni verið sagt frá þætti sem sýndur er í Bretlandi sem sameinar fjölskyldur. „Ég man ekki alveg hvað hann heitir en mér var bent á að hafa samband, þau hefðu eflaust áhuga.“

Aðspurð hvort hún sé vongóð um að hitta föður sinn eða fá einhverjar upplýsingar um hann segist hún hafa lesið þær ráðleggingar, á síðu fyrir börn og aðra í leit að ættingjum sínum, að gera sér ekki of miklar vonir.

„Það væri frábært að fá bara einhverjar upplýsingar, hvort hann er enn á lífi eða ekki. Líka að komast að því hvort ég eigi kannski einhver systkini eða fjölskyldu, sem væri þá frábært að fá að kynnast,“ segir Linda.

„Þannig að jú, auðvitað er ég vongóð. Ég ætla allavega að halda í vonina.“ 




Fleiri fréttir

Sjá meira


×