Innlent

„Að mörgu leyti góður drengur“

Hjörtur Hjartarson skrifar
Björgvin G. Sigurðsson, fyrrverandi viðskiptaráðherra, segist saklaus af ásökunum um fjárdrátt í starfi sínu sem sveitarstjóri í Ásahreppi. Hann viðurkennir hinsvegar að hafa farið á svig við reglur. Björgvin segir dómgreindarbrest sinn stafa af óhóflegri áfengisneyslu sem hann hyggst leita sér hjálpar við.

Björgvin tók við starfi sveitastjóra Ásahrepps 1.ágúst síðastliðinn og var ráðningin út yfirstandandi kjörtímabil. Síðastliðinn föstudag skrifaði Björgvin hinsvegar undir starfslokasamning við Ásahrepp. Ástæðan fyrir brotthvarfi Björgvins urðu ekki ljósar fyrr en Fréttablaðið greindi frá því í morgun að fyrir lægju ásakanir um fjárdrátt upp á mörg hundruð þúsund krónur.

„Það sýnir náttúrulega alvarleika brotsins að við sögðum honum upp á föstudagsmorguninn. Við undirrituðum þá samning um starfslokin og að hann myndi endurgreiða þetta fé,“ segir Egill Sigurðsson, oddviti Ásahrepps.

Samtals nemur fjárhæðin sem Björgvin dró sér í heimildarleysi ríflega fjögur hundruð þúsund krónum. 250 þúsund krónur skráði hann sem fyrirfram greidd laun en restina tók hann út af debetkorti hreppsins, meðal annars myndavél, matvörur og bensín. Í samtali við Vísi í dag segir Björgvin það hafa verið mistök að leita ekki heimilda fyrir fjárúttektunum en alltaf hafi staðið til að endurgreiða þær, það sýni sig í bókhaldi hreppsins.

Sjá einnig: Ólína segir illa innrætta óvini sækja að Björgvin

„Það er kannski hægt að nota öll orðin um það en á það ber að líta að fyrirframgreiðslan var gerð í nóvember og það er búin að fara fram ein launaútgreiðsla síðan í sveitarfélaginu, hún var gerð rétt fyrir jól. Þá vakti hann ekki athygli á því að það væri búið að greiða honum fyrirfram, 250 þúsund krónur, heldur er það ógreitt enn í dag, 19.janúar.“

„Vissi einhver um þessar fjárúttektir Björgvins annar en hann sjálfur?“

„Nei.“

Egill Sigurðsson, oddviti Ásahrepps
Björgvin vildi ekki veita sjónvarpsviðtal vegna málsins í dag en sendi fréttamanni hinsvegar eftirfarandi skilaboð:

„Sæll, ætla að takast á við eigin djöfla og fara í meðferð, sem ég gerði farsællega fyrir 10 árum og átti nokkur góð ár en ég fór út af sporinu með tilheyrandi tjóni. Held ég láti þar við sitja að ræða þessi mál þar til ég kem aftur út.“

Oddviti Ásahrepps segir að ekki hafi verið tekin ákvörðun um hvort málið verði kært til lögreglu.

„Það er ekki útilokað. Sveitastjórnin yrði þá að taka ákvörðun um það,“ segir Egill og bætir við að það sé bara eitt fórnarlamb í þessu máli.

„Það er Björgvin G. Sigurðsson sjálfur. Hann misfór þarna með trúnað og hann á alla mína samúð í því. Að mörgu leyti góður drengur og í vondri stöðu núna.“


Tengdar fréttir

Fyrrverandi ráðherra rekinn vegna fjárdráttar í Ásahreppi

Björgvin G. Sigurðsson dró sér fé í starfi sínu sem sveitarstjóri Ásahrepps. "Fyrst með litlum greiðslum hér og þar, en vatt upp á sig líkt og snjóbolti sem rúllar niður brekku,“ segir Egill Sigurðsson, oddviti Ásahrepps.




Fleiri fréttir

Sjá meira


×